भिवंडी दि.२६ ( गांवकरी TODAY NEWS) शहरात अनंत चतुर्दशीच्या गणेशमूर्तींची विसर्जन मिरवणूक परंपरागत शहरातील बाजारपेठ मार्गे जात आहे. मात्र या मार्गावर असलेले वीजवाहिन्यांचे जाळे मोठ्या मूर्तीना अडथळे ठरल्याने सार्वजनिक गणेशोत्सव महामंडळाचे अध्यक्ष मदन भोई यांनी टोरेंट पॉवरच्या कार्यालयात तक्रार केली होती. त्यानुसार या कंपनीच्या अधिकारी आणि कर्मचाऱ्यांनी प्रत्यक्ष मिरवणूक मार्गाची पाहणी करून अडथळे दूर करण्याची कारवाई सुरु केली आहे.भिवंडी शहरात आणि परिसरात सुमारे १५० पेक्षा जास्त सार्वजनिक गणेशोत्सव असून त्यापैकी बहुतांची सार्वजनिक उत्सवातील गणेश मूर्तींची मिरवणूक शहरातील मुख्य बाजारपेठेतून अनेक वर्षांपासून वाजत-गाजत जात आहे. मात्र गेल्या काही वर्षांपासून गणेश मूर्तींची उंची वाढली असल्याने त्यास वीजवाहिन्यांचा अडथळा निर्माण झाला आहे. बाजारपेठेत नवीन बांधकामे करून काही दुकानांच्या इमारती उभ्या राहिल्या आहेत मात्र बाजारपेठेत रस्ता रुंदीकरण झाले नाही. त्यामुळे बाजारपेठेतून जाणाऱ्या सर्वच धार्मिक मिरवणूक आणि पालखीला अडथळा निर्माण होत असतो.मात्र हा विषय प्रामुख्याने गणेश मूर्तीच्या मिरवणुकीच्या वेळी चर्चिला जातो.यावर्षी बाजारपेठ ठाणगेआळी मधील हनुमान मंडळाच्या गणेशोत्सवाची मूर्ती मोठी आणि उंच असल्याने टोरेंट पॉवरच्या अभियंत्यांनी मूर्तीचे मोजमाप करून अडथळे दूर करण्याची कारवाई करण्यास सुरुवात केली आहे.तसेच गणेशोत्सव महामंडळाचे अध्यक्ष मदन भोई यांच्या बरोबर मिरवणूकमार्ग फिरून अडथळ्यांची माहिती घेतली.
